الاقصى
#navbar-iframe { height: 0px; visibility: hidden; display: none; }

Saturday, September 23, 2006

واتى رمضان... فأين الهمة؟


img104/3050/islamicbackground34hl9.jpg


 


 وأتى  رمضان..... فأين الهمة؟


 


رمضان... شهر الرحمة... شهر الغفران... شهر العتق... قد أتى..


اقبل رمضان.. اقبل شهر الجوائز.. اقبل شهر تصفيد الشياطين... أتى شهر الشحن الايمانى...


شهر القيام... والصيام.. والمناجاة... والدعاء في جوف الليل... اكثر شهر تشعر فيه انك قريب من الله عزوجل...


 


رمضان اتى إلينا بخيراته وجوائزه... رمضان اتى الينا بحلاوة الايمانيات التي يعيشها الفرد فيه..رمضان اتى الينا بتوطيد العلاقات الاجتماعية بين الاسرة الواحدة... بين الصحبة الصالحة...


 


اتى رمضان..... ويكفي ما قاله رسول الله صلى الله عليه وسلم... فلنقرا ولنتدبر كل كلمة..


أيها الناس قد أظلكم شهر عظيم شهر مبارك شهر فيه ليلة خير من ألف شهر جعل الله صيامه فريضة وقيام ليله تطوعا.... من تقرب فيه بخصلة من الخير كان كمن أدى فريضة فيما سواه... ومن أدى فيه فريضة كان كمن أدى سبعين فريضة فيما سواه.... وهو شهر الصبر والصبر ثوابه الجنة وشهر المواساة.. وشهر يزداد فيه رزق المؤمن... من فطر فيه صائما كان مغفرة لذنوبه وعتق رقبته من النار وكان له مثل أجره من غير ان ينتقص من أجره شيء... قالوا ليس كلنا نجد ما يفطر الصائم فقال يعطي الله هذا الثواب من فطر صائما على تمرة أو شربة ماء أو مذقة لبن... وهو شهر أوله رحمة واوسطه مغفرة وآخره عتق من النار من خفف عن مملوكه غفر الله له واعتقه من النار.... واستكثروا فيه من أربع خصال خصلتين ترضون بهما ربكم وخصلتين لا غنى بكم عنهما فأما الخصلتان اللتان ترضون بهما ربكم فشهادة أن لا إله إلا الله وتستغفرونه... وأما اللتان لاغنى بكم عنها فتسألون الله الجنة وتعوذون به من النار ومن أشبع فيه صائما سقاه الله من حوضي شربة لا يظمأ حتى يدخل الجنة


 


تخيل .... كل ده خير... كل ده ثواب واحنا بعيد عنه... تتقرب إلى الله عزوجل شئ خير فتكون كمن اديت فريضة... ثواب الفريضة مثل سبعين فريضة في الايام العادية... تفطر صائم فيه.. يتغفر ذنبك وتعتق رقبتك... تخيل تعتق رقبتك من النار... واذا اعتقت فلن تمسك النار ابداً... ما تيجوا ندخل  رمضان السنة دي وانا هدفي العتق من النار... باذن الله مش هخرج من رمضان الا وقد اعتقت... خلاص العملية انتهت.. لن تقربك النار باذن الله عزوجل... ما يلا باة... يلا رمضان العتق...يلا رمضان الهمة...


 


ما نخلي رمضان السنة دي عشان امتنا.. عشان اسلامنا..هنصوم السنة دي وهنقوم الليل وهندعي... بس باخلاص... عشان امتنا المسكينة... عشان اسلامنا الذي يهان كل يوم من كل دنيئ ... وعشان رسولنا الذي تعدي عليه احقر اهل الارض... هنصوم بجد... عشان نشحن نفسنا ايمانياً بجد ونكون مستعدين للقادم..


 


رمضان جه والشياطين مصفدة... اقرا الحديث الصحيح عن أبي هريرة رضي الله؛ أن رسول الله صلى الله عليه وسلم قال: "إذا جاء رمضان فُتّحت أبواب الجنة ، وغُلّقت أبواب النار ، وصُفّدت الشياطين"


 


يعنى انت لوحدك من غير شيطانك.. انت وربك..  من غير شيطانك... يعنى لو بتعمل معاصي في رمضان يبقى ده من نفسك... كلنا بنعمل معاصي في رمضان... ومحدش بيحس اد ايه ازاي نفسه وحشة اوي كده.. ازاي من غير شيطان وممكن اكون برتكب معاصي اكتر... ازاي... يعنى نفسى اوحش من الشيطان... طيب ما يللا باة.. جه الوقت لكى نؤدب هذه النفس... يلا ... مستنى ايه....


 


طيب شوية حاجات مساعدة كده في السريع...


1-     قراءة جزء كامل يومياً من القران على اقل تقدير... وعدم تضييعه مهما كانت الظروف.. واليوم الي يضيع فيه اليوم الي بعده قراءة ضعف الورد الي بقراه لتاديب النفس..


2-     السنن.. محاولة الحفاظ على السنن على قدر ما نستطيع... ومتنسوش الثواب المضاعف للسنن في رمضان..


3-     الابتعاد عن التليفزيون والنت قدر الامكان وتقليل عدد ساعات الجلوس عليهم.. ودي يمكن تكون صعبة بالنسبة لناس كتير مدمنة نت زيي... بس ده شهر.. معلش اضغط على نفسك.. يعنى لو كنت بتقعد على النت والتليفزيون تلات ساعات يومياً.. معلش ظبطهم خليهم نص ساعة... ساعة بالكتير اوي.. ومش لازم تقرا كل الميلات الي بتجيلك.. ومش لازم تخش على كل المواقع الي كنت بتدخل عليها..ومش لازم تكلم مع كل الناس الي كنت بتكلم معاهم.. معلش لمدة شهر بس...


4-     صلاة القيام والتهجد... ودي من الحاجات الي بترفع الواحد ايمانياً جداً في رمضان.. فحاول تروح لشيخ تستمع بالصلاة معه.. حتى لو كان بعيد شوية.. بس معلش.. هتفرق معاك اوي انك تصلى مع واحد صوته كويس غير لما تصلى مع واحد صوته مش عاجبك.. يمكن انا هحاول احط اشهر المساجد لكل منطقة الي الائمة فيها صوتهم حلو.. طبعاً انا مرحتش كل المساجد دي.. ولكن من اصحابى الي بيروحوا يصلوا فيها .. وانا صليت في بعضها الاخر..واطلب من كل شخص الله يكرمه يعرف مسجد الامام بتاعه صوته كويس يبعتلى عشان نزوده..


المهندسين: للاسف حتى الان لا يوجد شئ ظاهر لائمة مشهورين.. ولكن يوجد الرواس "السيدة زينب" والي هيصلى فيه الشيخ رجب زكي باذن الله.. وفي "ابو بكر" الي في شارع عمان.. وده بيصلي في تلات شباب صوتهم جيد.. (توصية واحد صاحبى).. فيه "التوبه" الي جنب العمدة الي في جامعة الدول.. وده بيصلى فين برضه واحد صوته كويس..


مدينة نصر: غالباَ بإذن الله في مسجد "الحسن" وهيصلي فيه الشيخ المتالق خالد ابو شادي.. وفيه مسجد "بلال" الي في مكرم عبيد وبيصلى فيه الشيخ المتالق " الشيخ رضا".. وده صوته رائع بما للكلمة من معنى..وانا رحتله السنة الي فاتت كذا مرة..


المعادي: بصراحة انا مليش في المعادي اوي.. بس الي اعرفه من اصحابى ان في مسجد كويسين... "دار الفائزين" و "المدينة"..


الهرم وفيصل: وفي مسجدين معروفين لكل الناس طبعاً... مسجد "السلام" الي جنب "داري".. ومسجد " العباسي " الي في الطلبية..


5-     الصحبة الصالحة... ودي اهم حاجة هتعينك في رمضان...


6-     حاول ولو مرة واحدة تشارك في اي نشاط خيري.. شنطة رمضان.. اطعام.. اى حاجة تسعد بيها ناس فقيرة هتدعليك... وصدقنى هتفرق معاك اوي وانت رايح للست في بيتها عشان تديها فطار سخن او وجبة جافة.. هتفرق معاك سعادتها وفرحة اولادها بالفرخة او اللحمة الي في الوجبة..  هتفرق معاك اوي احساس الكفالة الاجتماعية الاسلامية.. ده غير طبعاً ثواب افطار صائم الي هتاخده.. غير الصحبة الرائعة الي هتكون معاها وانت بتوزع.. دور جبنك وشوف الجمعيات والشباب الي حواليك وظبط معاهم... ملقتيش تعالى معانا يا عم.. فريق صناع الحياة الدقي عامل افطار جاف وساخن لعشرات الاسر الفقيرة يوم 13-20 رمضان.. ابعتلى وانا اوصلك بيهم وصدقنى هتفرق معاك اوي..


7-     اقرا كتيب دكتور خالد ابو شادي الجديد عن رمضان... فاقل ما يقال عنه انه رائع


8-     اسمع شرائط كيف نستقبل رمضان للشيخ او الداعية الذي تستريح له... وانا انصح بشريط عمرو خالد بالرغم من اختلافي الشديد لما قام به في السنة الماضية.. الا ان كل يؤخذ منه ويرد الا رسول الله. وانا اعتقد ان هذا الشريط من اقوى الاشرطة عن رمضان خصوصاً ان عمرو خالد كان قد القاه ايام تالقه في مسجد الحصري.. ولكنى ساضع شرائط لمختلف الشيوخ حتى سيتمع كل شخص لمن يفضل


كيف نستقبل رمضان؟.. عمرو خالد


رمضان وبناء الامة.. الدكتور راغب السرجاني


دروس الشيخ محمد حسين يعقوب عن رمضان


دروس الشيخ محمد حسان عن رمضان


رمضان يناديكم... خالد الراشد


من الطارق؟.. انا رمضان .."محمد اسماعيل المقدم


نسائم رمضان.. الشيخ نبيل العوضي


في رضمان يكرم المرء او يهان.. الشيخ وجدي غنيم


كيف تفوز برمضان... الشيخ محمود المصري


يوم في حياة صائم.. الشيخ محمود المصري


 


وفي النهاية لا تنسوا الدعاء لكل امة الاسلام بالنصر والعزة والتمكين في كل سجدة نسجدها في رمضان

Labels:

6 Comments:

At 7:48 AM, Anonymous Abd El Rahman said...

ده فين مسجد بلال ده يابراء؟ الشيخ رضا كان بيصلي في الارقم من سنتين والشيخ ياسر سلامة في السلام وسمعت انه هيصلي في ابو بكر الصديق اللي في مساكن شيراتون ، عموما اول يوم هنعرف كل حاجة

ربنا يتقبل ياباشا

 
At 1:40 PM, Blogger shab masry said...

لا يا ريس الشيخ رضا صلى السنة الي فاتت في مسجد بلال.. يمكن من سنتين كان في الارقم .. لكن السنة الي فاتت والسنة دي غالباًً في مسجد بلال.. المسجد انا معرفش مكانه بالظبط لانى كنت بروح مع اصحابي في العربيات وهما الي كانوا عارفين المكان بالظبط.. لكن الي اعرفه اه في شارع متفرع من مكرم عبيد واظن ان بكمية الناس المهولة الي كانت بترحله السنة الي فاتت هتلاقي ناس كتير اوى تقلك على مكانه بالظبط..

الشيخ ياسر سلامة.. كويس انك فكرتني بيه.. ياسر سلامه من اجمل الاصوات الي كنت تسمعها.. انا صليت معاه كذا مرة لما كان بيصلى في دعوة الحق مع الشيخ صفوت حجازى.. وفعلاً صوته رائع..بتحس فعلاً انك مش في الدنيا مع صوته الرائع.. ياريت الله يكرمك اول ما تعرف تقولنا.. ولو ان المكانين بعيد عني جداً. .. بس بصراحة المشوار يستاهل

 
At 10:02 PM, Blogger شــهــروزة said...

ولو انى ماعرفش الناس اللى بتحكوا عنها دى
بس مش مشكلة
كل سنة وانتوا بالف خير
رمضان كريم عليكم يا رب

 
At 7:49 PM, Blogger حــلم said...

ربنا يكرمك

كل سنة وانت طيب

 
At 2:28 PM, Anonymous Anonymous said...

Al salamo Alikom

مسجد بلال : لو إنت في شارع مكرم عبيد خليك ماشى فيه على طول هتقطع مصطفى النحاس و تكمل شوية كدة هتلاقى عمر أفندى على شمالك و الشبراوى , علي اليمين قدامهم فيه شارع إدخل فيه هتلاقى المسجد على شمالك

و لو من عباس العقاد , كمل فيه لحد وندر لاند لما تبقى على يمينك و فيه مصر للطيران على شمالك , غدخل شمال في شارع مصر للطيران ده هيكون المسجد على يمينك

 
At 4:17 AM, Blogger Zheng junxai5 said...

zhengjx20160527
mont blanc pen
ralph lauren outlet
coach factory outlet
nike sb dunks
michael kors outlet clearance
adidas uk
kids lebron shoes
ghd hair straighteners
louis vuitton outlet
retro 11
nike outlet store
air force 1 trainers
michael kors outlet clearance
ralph lauren polo
coach outlet store online clearances
coach factory outlet online
beats by dre outlet
fitflops
ray bans
vans sneakers
kobe 8
cheap air jordans
nike sb janoski
michael kors outlet
kd 8
michael kors outlet
rolex watches
ralph lauren home
oakley outlet
coach outlet online
michael kors handbags
montblanc pen
louis vuitton purses
nike roshe one
coach outlet
replica watches
replica rolex watches
discount jordans
burberry outlet
ray bans

 

Post a Comment

Links to this post:

Create a Link

<< Home