مهازل القطارات.. وفيديو كلاب النظام وامن الدولة... كلاكيت للمرة المليون...

في مهزلة اخرى من مهازل النظام المصرى... وبعد اقل من ستة اشهر على مصرع 1200 مصرى في العبارة الي صاحبها هربان لحد دلوقتى وحتى معملوش اى حاجة عشان يقاضوه... لقى اكثر من 60 شخص مصرعهم واصيب المئات في اصطدام قطارين... مش عارف باة لحد امتى الناس هتفضل ساكتة على هذا النظام المجرم الذي ارتكب عشرات الجرائم في حق المصريين.. من برنامج الزفت الرئيس رعاية محدودى الدخل وتوفير حياة كريمة وترخيص الاسعار.. اول امبارح كنت مع واحد صاحبى فكنا بنتكلم على الغلاء.. فقالى ان الاتوبيس ودى وسيلة النقل الشعبية في مصر باة ب 50 قرش بعد ما كانت ب 25 قرش.. تخيلوا حياة الموظف البائس الي عايش بي 150 جنيه في الشهر ومعاه 4-5 اطفال.... كيف يعيش؟؟؟  ده غير ان المترو غلى وباة بجنيه بعد ما كان ب 50 قرش الاول .. والميكروباصات غليت.. وكل المنتجات التمونينة غليت.. مفيش حاجة رخصت او حتى فضلت على سعرها... مش عارف لحد امتى الناس هتفضل ساكتة... لحد امتى هنفضل ناخد على دماغنا ونسكت... لازم وقفة باة.. لازم حاجة تتعمل ضد هذا النظام المجرم.... كفاية باة... لن نخاف من امن الدولة ولا غيرها... اول امبارح زميلة معايا في الكلية تقول لى ان رعاية الشباب في الكلية عرضوا عليها فلوس عشان هيا بتعمل انشطة في الكلية وهما مش عايزنها تعمل حاجة... وادى رعاية الشباب.... لو حطونا كلنا في امن الدولة برضه مش هنخاف وهنصمد... كرامتنا مش هتتهان اكتر ما هيا متهانة دلوقتى....

 

اضغط على الصورة للمشاهدة والتحميل

اذا لم يعمل اللنك يمكنك التحميل من احد هذين اللنكين..

http://www.zippyvideos.com/6473589235863426/ta3zeb/

 

http://www.zippyvideos.com/5095493205854776/ta3zeeb_kesm_elharam

 

وفي ذورة الغضب على هذا النظام ال..... فوجئت بفيديو جديد يظهر...  لكلب من كلاب الشرطة وهو نازل هو واصحابه ال....  تعذيب وبهدلة في مواطن مصرى...  حركات بذيئة بصابعه وبعدين نازل فيه ضرب بالاقلام  والحيوان بيشوف اد ايه هو سريع وهيقدر يضرب الراجل الغلبان كام قلم في الساعة.... واحد مصرى غلبان تلاقيه معملش اى حاجة واخدنيه تحقيق.. فالحيوان امين الشرطة ملقاش حاجة يعملها هو واصحابه فقالك نديها تعذيب في الراجل الغلبان ده... مهو اصل الناس مبقاش ليها قيمة في عهد هذا الديكتاتور الي اسمه مبارك.. انا شفت الفيديوا ومش عايز اقولكم كمية الغضب الي كانت جواى على هذا النظام القذر واذنابه... كفاية باة.. حرام الي بيحصل فينا... لحد امتى هنفضل ساكتين.. مهو كلما هنشوف الحاجات دي ونسكت... كل ما هناخد فوق دماغنا اكتر....

 

ثورة باة يا شعب... ثورة يا ناس... فاضل ايه من كرامتنا.... في سياستنا الخارجية خلاص بقينا الدولة الي ملهاش لازمة... ناخد تعليماتنا وننفذ واحنا ساكتين... نضرب على الحدود ويتقتل جنودنا ده عادي فالصديق الصهيونى لم يكن يقصد ولا داعى لطرد سفيره او غلق سفارته التى تطل على نيل مصر الطاهرة.. في اقتصادنا القوى.. في رخص الاسعار الي قاعدة بترخص كل شوية... مش عارف هتقعد ترخص لحد امتى بصراحة على راى الست الغلبانة بتاعت الجرير.... في كرامة المواطن وحرية الراى والديموقراطية الي مغرقة الشوارع... في ال25 الف معتقل سياسي الي في السجون... في الضرب والبهدلة الي بياخدها كل واحد في مقر عبيد النظام (امن الدولة)... في المخبرين الي باة اكتر من طلبة الجامعة... في كل حاجة....

 

لازم ننشر الفيديو ده في كل مكان...لازم يوصل لكل وسائل الاعلام ... كل واحد يعرف صحفى يبعتهوله... لازم يوصل لكل وسائل الاعلام المرئية والمسمعوة والمكتوبة..

 

 وعلى فكرة دى الشرطة العادية.. مش امن الدولة... امن الدولة باة الي بيحصل اضعاف اضعاف ده.... لازم نعرف الناس كلها اد ايه النظام ده مجرم... خلاص مش هنسكت ولو ودونا فين... مش هنسكت لان كرامتنا اغلى حاجة عندنا... مش هنسكت عشان المواطن الغلبان ده والالوف الي بيضربوا زيه ومحدش بيحس بيهم... مش هنسكت وبنقلها بصوت عالى للكلب الكبير بتاع النظام "البقرة الضاحكة" ولكل كلابه وعبيده.... من قلوبنا.....

 

بنكرهكم....