الحب... بس من منظور اسلامى

الحب.... كلمة عظيمة في معناها... عظيمة في محتواها.. عظيمة في كل شئ...

حبيت اتكلم عن الحب... بس المرة دي مش بالمنطق والعقل زى سلسلة "كلمة إلى اخواننا السلفين".. ولا بالخطاب الثورى زى المقال الاخير... لا المرة دي انا سايب قلبى يتكلم.. سايب قلب احب منذ نشاته عشرات الاشخاص... عشرات منهم اخطا في حقهم.. هذا القلب الذي يحمل في طياته حب لا يمكن وصفه لعشرات الاصدقاء... تارك هذا القلب يتكلم بقلمى.. ليعتذر للكثير... الذين لم يستطع البوح لهم بحبه... لعشرات الاشخاص الذين مررت بهم طوال حياتى واحببت الكثير منهم... ولكن ابى هذا القلب الا ان يكون هذا الحب مكتوماً... لا يستطيع ان يطلقه ....

 

كان لابد لهذا القلب ان يتحدث... ليعتذر...

 

وجائت الفرصة..خلال الفترة الماضية مررت بالعديد من المواقف والافراح المتعددة في فترة قصيرة جداً.. وخصوصاً ان اغلب هذه الافراح كانت لاشخاص مقربة منى جداً.. لاشخاص عديد منهم احببتهم في الله عزوجل بصدق.. وكنت معهم في نقاط كثيرة من نقاط الاستعداد لكتب كتابهم او خطوبتهم او افراحهم... كان يساورنى شعور غريب ساعتها.. عن الحب.. كنت اشعر ان الحب يملأ المكان... باختلاف انواعه... الحب في الله عزوجل بين الاخوة الذين جاؤوا من كل مكان ليفرحوا لفرحة اخيهم... حب الله عزوجل باصرار الاخ او الاخت على ان يكون فرحهم كله طاعة لله عزوجل... حب الله عزوجل للعبد باشياء تظهر وتحدث في فرح هذا الاخ... الحب الفطرى بين الرجل والمراة فى اسعد لحظاته... حين يكون قد عقد قرانه.. يتجلى هذا الحب باروع صوره بين العريس والعروس.. حب لا يمكن وصفه... لا يمكن للمرء عندها الا ان يدعو ان يدوم هذا الحب دوماً...

 

الحب نعمة من اعظم نعم الله عزوجل على الاطلاق... الحب نعمة لا يمكن تخيل فقدانها.. هل يمكن لاحدنا تخيل ان يعيش بدون حب من والدته؟؟؟ تخيل كده؟؟؟ مش قادر صح..... طيب تخيل كده عايش من غير حب من عائلتك؟؟؟ تخيل بس.... تخيل نفسك عايش من غير اعظم حاجة "حب العبد لله".. تخيل نفسك كده عايش من غير  حب ربنا ليك... قادر تتخيل... قادر تتخيل كل النعم الي انت عايش فيها دي وانت عاصى ورغم كده تزداد بحب الله لك... انا مش قادر اتخيل بصراحة... حد ممكن يتخيل مجتمع عايش من غير حب؟؟؟ عايش ازاى طيب؟؟؟ يمكن حاجات كتير اوى بنشفها لا تعبر الا عن الحب... في مصر وفي كل مكان لما اى حد يحصله حاجة تلاقى اصحابه وجيرانه يهبوا لمساعدته.. محدش فكر ليه.. بس لو فكرت هتلاقيه شئ اسمه الحب....

 

طيب ما تيجوا نفتح المصحف... دور كده... ان الله يحب... ان الله لا يحب... شوف كده كام مرة؟؟؟ هتلاقى كتير اوى.. مش فاكر العدد بالظبط... بس لما تلاقى كده هتعرف ان اصل العلاقة بين العبد وربه لها كلمة سر... الحب... لو اى حد عايز يمشى صح هيعمل ايه... سوف يكون في كل موضع يحب ان يراه الله فيه ويبتعد عن اى موضع يكره الله عزوجل ان يراه فيه.. حد فكر فينا في الموضوع ده بالطريقة دي قبل كده؟؟؟؟

 

حد فكر بالحب بس مش بطريقتهم لان ما يفعل في الافلام والمسرحيات ليست حباً والله... فكر بالحب بالطريقة دي... بالطريقة الصح...

 

حد قادر يتخيل ان هو يعيش من غير حب في الله؟؟ مش قادر خالص... مش قادر اتخيل انى عايش مع ناس واخوة واصحاب من غير حب في الله... شعور  لا يستطيع وصفه الا من عاشه....

 

لو قعدنا نتكلم في الحب في الله والله ما هنخلص... والله الواحد بيفتكر رحلات وقعدات واشخاص واحداث حصلت من زمان اوى مع حاجات تانية.. بس الفرق ان دي بتكون تحت ظل الحب في الله عزوجل... ودى لا يمكن تتنسى عشان كده...

 

الحب اتزيف واتظلم كتير اوى في افلامنا ومسلسلاتنا ومسرحياتنا.. قصروا الحب على الجنس... اغفلوا اعظم قيم الحب... اغفلوا الحب نفسه....

 

خلوا كل واحد ملتزم يحس ان الحب عيب... مع ان الحب اطهر شئ يمكن ان يشعر به الانسان..

 

عايزين نتكلم بكل صدق.. لنقول للجميع هذا هو الحب.. وليس ما تقدموه عبر وسائل الاعلام..

 

 

عايزين الكل يعرف ويعيش يعنى ايه حب في الله.. يعنى ايه شباب زى اى شباب بيحبوا بعض... بس بيحبوا بعض عشان ربنا سبحانه وتعالى... تفرق كتير اوى... والله تفرق وجربوا.. جرب كده تقعد مع شباب ملتزم.. جرب تسافر مع شباب ملتزم بيحبوا بعضهم في الله عزوجل... والله هتتنمى ان السفر ده ميخلصش.. والله هتعرف اد ايه يفرق سفر عن سفر.. جرب يكون لي صديق تعاهده على الحب في الله... والله هيكون احلى صديق.. جرب صدقنى والله هتعيش احلى حياة واسال مجرب...

 

طيب جربت مرة تكون علاقتك بربنا سبحانه وتعالى مش عبد يلبى طلبات سيده فقط... طيب ما تجرب باة تكون عبد لسيدك... بس عبد بحب.. تقوله انا بعبدك عشان بحبك يارب... تروحله بحب .. تقوله جايلك عشان بحبك يارب...جرب وصدقنى مش هتخسر..

 

ما تيجوا الاسبوع ده نجرب الحاجتين دول.. نجرب ولو لاسبوع واحد ان انت تعيش في جو حب في الله عزوجل.. جرب وانزل المسجد الى تحتك وقابل الشباب وكلم اصحابك الملتزمين... قلهم عايز اكون معاكم... عايز اعيش معاكم في جو الحب في الله..  وحتى الملتزمين.. يمكن الحاجات دي بات عادة عند كل الناس.. لكن ما تيجوا نجدد العمل ده في قلوبنا... ما تيجوا نقعد تانى مع بعض ونجدد  الحتة دي بينا.. والله والله هتفرق معاكم اوى... صدقونى الي جرب وعاش حاجة اسمها الحب في الله هيعرف كل كلمة من الي بقولها... والي كان كل اصحابك مش ملتزمين ومجربتش التجربة دي.. جرب مش هتخسر حاجة... والله مسكين الي مجربش الحب في الله...

 

الحاجة التانية الي نجربها... اسبوع عبادة... بس بحب... مش لانى لو مصلتش هاخد ذنب... لا انا هعبده اسبوع عشان بحبه.. عشان بحبه ببساطة....

 

طيب انا هديكم وسيلتين مساعدة... نشيدين هما اجمل ما سمعت عن الاخوة والحب في الله.. اطفى نور اوضتك... تخيل شخص او اشخاص تحبهم في الله واستمع..  ركز في الكلمات.... والله هتدعيلي ان شاء الله...

 

النشيد الاول: اخى في فؤادئ وفي مسمعى (اضغط للتحميل)

النشيد الثانى: لا تلمنى ان قسوت عليك (اضغط للتحميل)

 

المرة الي جاية ان شاء الله نخش في الحب الي بيجيب مشاكل... الحب بين الشباب والبنات وماذا يفعل الملتزم وكيف يتعامل اذا احب؟