الاقصى
#navbar-iframe { height: 0px; visibility: hidden; display: none; }

Tuesday, April 08, 2008

سلسلة الزواج... البحث

السلام عليكم.. طيب خلاص دلوقتي انا ظبط مواصفاتي وكتبتها حسب الاولوية وابتديت تظبط مع اهلك وتدور.. طيب السؤال باة هتدور فين؟ وازاى المواصفات دي هلاقيها..؟؟ في اربع طرق


1-     انك تكون عارف حد بالفعل بالمواصفات دي سواء عن طريق جامعة او نادي او عمل او اخت صديق او او المهم انك تكون عارف حد بالمواصفات دي وشايف انها تنفعك.. طيب انت كده خلصت من قصة البحث دي غالباً.


2-     الام دوماً بتحب تساعد في الحتة دي وتبتدى تدور هيا كمان في محيط معارفها وصاحباتها وكده... بس هي الفكرة ان الام هتكون فاهماك اوي نفسياً ومن حيث الطباع وكده لكن فكرياً الى حد كبير بيكون صعب شوية.. لان غالباً التزام وفكر الاهل بيكون مختلف عن الابناء.. يعني الام مثلاً بتشوف تقلك يبني دي متدينة والله.. وهي باصة للتدين من ناحية اخرى تختلف عن رؤية ابنها الا اذا كان من بيت ملتزم.. لكن في نفس الوقت في ناس بتاخد العملية قفش واى حاجة تيجي من ناحية اهلهم لا مينفعش وبالتالي بيعمل مشاكل كبيرة مع اهله.. كان ممكن تتحل بسهولة لو عملها بطريقة تانية اظرف... ومش مشكلة لو شفت المواصفات الي والدتك بتقول عليها ممكن في حد منهم فعلاً كويس.. فواجب على كل واحد منا يتعامل بحكمة وهدوء شديدين لان في الاخر ام كل واحد فينا نفسها تفرح بيه ونفسها ان يكون جوازه ده اسعد جواز في الدنيا...


3-     انت قريب من داعية او شيخ له نفس فكرك ودماغك .. وهو غالباً بيكون ليه علاقات عن طريق زوجته مثلاً...


4-     وهي الفعالة الى حد كبير: انت لك اصدقاء متزوجون دماغهم ومستواهم زيك فبتبتدي تقلهم وهما بيدورولك في اصحاب ازواجهم...


 


بتبتدي يجيلك ترشيحات من الناس دي وانت بتتبدي تشوف... بس في ملاحظة مهمة هنا للشباب والاخوات..


مش كل الي يجلك تشوفه ومش كل الي يجيلك تخليه يدخل البيت... لا انت بتبتدي تفرز وتشوف ايه الي فعلاً ممكن يكون مناسب ليك وايه الي مينفعش خالص فمينفعش اشوفه اصلاً.. لان في اخوات اى حد يتقدم لها بتروح تقول اشوفه.. وهو ممكن مينفعش اصلاً وبالتالي بنلاقي ناس كتير داخلة وخارجة البيت.. وده بيعمل ضغط كبير على الاخت وعلى اهلها.. وكل شوية واحد داخل البيت...فبالتالي الافضل كثيراً اننا نشوف هل هو فيه المواصفات المبداية ام لا.. ولو مفيهوش يبقى خلاص من الاول مشوفوش او مشفهاش... كنت مرة صديق عزيز علي كنا جايبنله اخت.. بس هو كان مشترط بضع حاجات كان منها شرط مش متوفر في الاخت دي..فانا كنت شايف ان الشرط ده مش الي هو مهم اوي..فبقله يبني طيب شفها مش هتخسر حاجة.. فقالي والله يا فلان انا فعلاً بتعب نفسياً من دخول البيت والخروج منه بدون نتيجة.. وفعلاً عنده حق


 


بعد كده بتستخير وتستخير وتستخير... وتوكل الله عزوجل في اختيار الافضل لك.. وتستشير...


 


طيب دلوقتي من الترشيحات الي جاتلي حسيت ان في اخت حاسس انها مناسبة وفيها كتير من الصفات الي انا عايزها.. الافضل الان رؤيتها قبل ما اتقدم بشكل رسمي.. عشان يشوف هل فيه قبول من البداية ام لا.. يعني ممكن تكون المواصفات وكل حاجة تمام.. بس هو يشفها ميستريحش او ميكنش في قبول.. فالافضل انه يرتب مع الوسيط الي جايبهاله انه يراها خارج البيت من غير ما تعرف..


طبعاً الجزء ده يعني بيكون فيه من الطرف والضحك مقالات وصفحات ..... الاخ وهو بيشفها في الشارع فاكر ان ال 1000 واحد الي ماشين في الشارع عارفين انه رايح يشوف فلانه.. وفاكر انها كمان عارفة..  فبتلاقي ودانه حمرا ووشه جايب الوان.. ولو بس الاخت بصتله صدفة زي ما بتبص لاى واحد ماشي في الشارع.. تلاقيه وشه جاب الوان الطيف ويقلك بس خلاص دي عرفت... الخلاصة يجب هدوء اعصاب ويقين انك مش بتعمل حاجة خطا... وفي نفس الوقت كن ذكياً.. يعني في اخوة تلاقه واقف ومبحلق في نص الشارع... او واحد تاني عدى رايح جاي من ادام الاخت يجي 10-15 مرة.. مش كده يعنيJ...


 


من فترة قصيرة صديق كان رايح يشوف اخت الساعة 6ونص الصبحوهيا راحة الشغلJ.. طبعاً اخونا اخد من الاصدقاء ما فيه النصيب من التريئةJJ...


هنا اريد التطرق لنقطتين الاولى اهمية الكتمان.. حتى ينتهي الامر..يعني مش انا رايح اشوف اخت واو رايح اتقدم لها.. اروح قايل لكل من اعرف وانشر في الشارع انى رايح اتقدم لفلانة.. لا طبعاً "استعينوا على قضاء حوائجكم بالكتمان".. حتى اذا لم يكتمل الموضوع لا سبب من الاسباب.. لا توضع انت او هي في خانة احراج ملهاش لازمة...


 


الشئ الاخر.. وجوب الحكمة والذكاء في الوسيط عند التعامل في هذه النقطة.. عشان اى شئ ممكن يفهم بشكل خاطئ يدمر الدنيا خالص...


 


ولي هنا كلمة للوسطاء.. احياناً بتكون في مواقف تشعر فيها بالاحراج الشديد "واسال مجربJ".. او ضيق لان فلان مثلاً شاف عدد كبير من الناس ومحصلش نصيب فانت تعبت.. بصوا يا اخوانا تعالوا نتخيل كده ثواب الاخ الوسيط او الاخت الوسيطة.. كل ثواب هذه الاسرة المسلمة وابنائهما وكل ذريتهما هيكون في ميزان حسناته غير ثواب تزويج اثنين من شباب المسلمين.. حد متخيل الثواب؟؟ يبقى يهون الاحراج ولا ميهنش؟؟ والله يا جماعة اعرف ناس بتقع في مواقف غاية في الاحراج.. ولكنها بتستمر بكل قوة... اصل الهدف والناتج كبير وغالي ميتاخدش بسهولة.. ومش اى حد ياخده... هاه لسه برضه هفضل اقول اصل الموضوع محرج؟؟


 


طيب افرض كانت الاخت منتقبة.. مفيش غير انك تروح البيت...


 


طيب خلاص شفتها خارج البيت فعلاً وحاسس ان في قبول وتقدمت بالفعل.. في ناس بتفضل ان اول زيارة دي تكون خارج البيت.. يعني يروح هو ووالدته وهيا تيجي مع والدتها ويتقابلوا في اى مكان.. بحيث ان اول مرة لو محصلش قبول ميكنش في احراج من ناحية البيت وما الى ذلك "انا بقول هو ووالدته وهيا ووالدتها عشان البعض بيشيل حتة الوالدة ويكتفي بالصديق.:) وده طبعاً مش كويس وغير مقبول"... ده على حسب الاسرة .. لكن عموماً الافضل البيت...


 


اعتذر عن الاختصار هذه المرة ولكنكم تعلمون مدى دقة الوضع الان في مصر واهمية التحدث عنه... نكمل المرة القادمة مع الرؤية الشرعية باذن الله تعالى


 ----------------------------------------------------------------------------------------------


 


 


الاضراب:


لا اخفي سراً انى من المؤيدين بشدة للاضراب.. وكنت ارسلت عليه عدة ايميلات على القائمة البريدية للمدونة.. لكن بعد ان انتهى هل نجح الاضراب؟؟


اعتقد واجزم ان الاضراب نجح بصورة لم اكن انا شخصياً اتخليها.. ليه؟


لما تكون الجامعات واولها القاهرة وعين شمس وحلون والازهر شبه خالية تماماً والي راحوا لا يتعدوا باقصى تقدير ال 5% اغلبهم رايحين عشان يعملوا مظاهرة في الجامعة والباقي قاعد في بيته ده نجاح


لما الشوارع تكون شبه خالية تماماً لدرجة ان شخص ينزل من 6 اكتوبر للدقي في فترة لا تتعدى التلت الساعة.. وان شارع الدقي والبطل احمد عبدالعزيز تكون شبه فارغة من السيارات "انا من قرابة اسبوعين قعدت في الشارعين دول قرابة الساعة ونصف بسبب الزحمة وهما يتاخدوا بالعربية في 5 دقائق"...


لما العمال والطبقة الفقيرة البعيدة عن الطبقة المثقفة هي الي تبادر بالاضراب وكل عمال المحلة يخرجوا في الاضراب  في الشارع بعد ان منعهم الامن من الاضراب في المصانع..


لما الدعوة والتنفيذ يكون من الشباب ومن الشعب نفسه بعيداً عن المعارضة التى لا تملك سوى نفسها.. فهذا نجاح


ان يبادر الشعب نفسه لذلك وينزل للشارع ويتخلى عن سلبيته ويتحرك دون اى يتحايل عليه احد او يناشده معارضة او حزب.. فهذا في رايي نجاح ما بعده نجاح...


 


لكن في نفس الوقت محدش يتخيل ان الاضراب ده مصباح علاء الدين السحري الي هيخلصنا من هذا النظام الطاغية ومن السلبية التى عششت في الشعب خلال قرابة 30 عاماً..في يوم واحد.. الاضراب مش هينجح من اول مرة ولا حتى التانية او التالتة.. هينجح من المرة العاشرة والحداشر لما الشعب كله يشارك والهدف واحد.. القصر الجمهوري..!!


 


الاخوان والموقف السلبي..!!


في الحقيقة موقف الاخوان من الاضراب الاخير موقف سئ للغاية..لا ادرى على اشياء تم البناء عليه..!! والاعذار التى قدمها القيادات لا تصلح لان يكون اعتذارات اصلاً... مثل ان الاخوان لم يدعهم احد للاشتراك...! اولاً المنظم هو الشعب وبالتالي لا رؤوس له لكي يوجه شيئاً او دعوات.. الشئ الاخر حتى ولو لم يقدم احداً دعوة... فالداعي هو المصلحة العامة لمصر..!!


ندرك ان للاخوان حسابات واشياء اخرى يجب ان توضع في الاعتبار.. لكن... مش بعد ما كان الاخوان يوشكوا ان يقبلوا اقدام الناس للمشاركة والمعارضة منذ عشرين تلاتين سنة ولما الناس تيجي تتحرك يروحوا هما سايبنهم.. يا عم مقلناش مظاهرات لان فعلاً لو الاخوان نزلوا مظاهرات بدون تخطيط او ترتيب الدنيا هتتقلي... لكن على الاقل الدعوة للاشتراك في البيت والجلوس في البيت..! ما المشكلة في هذا؟؟؟ اديك شاركت في الاضراب ومعرضتش اعضائك للخطر.. لكن اديت دفعة قوية للناس... مش اخدت موقف رمادي لا معنى له...


على المكتب السياسي للاخوان ان يدرك انه مبقاش في حاجة اسمها موقف في النص.. لا يوجد مكان لموقف رمادي.. اما ابيض او اسود..!!


للاسف خسر الاخوان كثيراً بعدم مشاركتهم في الاضراب.. خسروا تاييد عشرات الشباب الذين تمذرو وسخطوا بشدة من هذا الموقف.. واعتبروا ان للاخوان حسابات اخرى بعيداً عن حسابات العمال والشعب الذين ينتمون اليه "ولهم حق صراحة بعد هذا الموقف"...


 


شئ اخر على الاخوان ان يدركوه.. ان السياسة لم تعد تنفع مطلقاً مع هذا النظام.. باى حال من الاحوال فلا مجلس شعب ولا محليات ولا اى سياسة ستنفع مع هذا النظام... واعتقد انهم يدركون اكثر مني ان الطريق السياسي قد اغلق...فهل سيقفوا ام سيتم البحث عن طريق جديد "بعيداً عن طريقة الانقلاب لانه لن ينجح ولا يتوافق مع اى فكر اسلامي معتدل لانه من المستحيل ان ينجح".. طريق الاضرابات والاعتصامات المدنية مفتوح...


كنت اتحدث مع بعض الاخوة عن القرارات الخاطئة المتتالية للمكتب السياسي لاخوان مصر فكنت اقترح ان يدرسوا  السياسة من المكتب السياسي لحماس.. فرغم الحالة الصعبة وانقسام قادت حماس بين الخارج والضفة وغزة والسجون وصعوبة الاتصال بينهم.. الا انك لا يمكن ان تجداً ابداً تناقض في التصريحات او قرارات عشوائية ... وكلها قرارات شورية على جميع المستويات رغم ان وضعهم يعد اصعب الاوضاع الموجودة لاى تنظيم اسلامي... يعني حقيقة بعد قرابة الثلاث سنوات من المتابعة المكثفة للحال السياسي الاسلامي في العالم.. اشهد ان حماس افضل وابرع واقوى تنظيم اسلامي في السياسة المرتبطة بالشرع "وليس هذا كلامي وحدي انما كلام العشرات من المتابعين والمحللين"...!! "طبعاً مع كامل احترامي للاخوة في مصر فكلهم لهم فضل علي يغطيني من راسي لقدمي"


 


 عموماً.. الطريق لم ينته بعد .. بل مازال في البداية... فهل يكون اضراب 4 مايو تصحيحاً للاوضاع؟


 


قبل الختام.. موضوع ساخر للصديق القديم عبدالرحمن يسري عن "الزواج وطلوع التيت".. :):)

Labels:

4 Comments:

At 2:52 AM, Blogger فليعد للدين مجده said...

أخي الشاب المصري
أقرأ مدونتك بانتظام منذ فترة ومعجب بها جدا
لكن موقف الاخوان له ابعاد أخري أدعوك لقراءة ما فهمته منها

http://drihabibrahim.blogspot.com/2008/04/blog-post_08.html
ولك جزيل شكري وتقديري

 
At 5:59 AM, Blogger شهيدة said...

الجزء المتعلق بالزواج جميل ومعتدل


اما المتعلق بالاضراب .. فالتحيليل سليم وجيد جدا ..

اما تحليلكم لموقف الجماعه ..

ارى الا نعول كثيرا على مثل هذه المواقف .. ان لفت النظر ان مشاركة الاخوان " قولا " -لاننا بالفعل شاركنا فعلا في الاضراب- يؤدي للشعور بحزبيه الاضراب ونزع غطاء الشعبيه من عليه ونحن كم سعدنا عندما اخذ الاضراب اسم شعب مصر وليس فئه بعينها ..

دعونا لا نتكلم كثيرا عن الموقف الذي صدر من الجماعه وان كان مراجعته داخليا واجبه .. لكن علينا الا نكبر الامر كثيرا حتى لا نفسد هذا الوئام الذي ضم اطياف المجتمع بلا مسميات حزبيه .. رأفة بمجتمعنا الحساس لاي زوبعه اعلاميه من هذا النوع
هذا رأيي ..

وجزيت الخير .. المواضيع قيمه للغايه

 
At 4:51 PM, Blogger همسات تربوية said...

مع تقديري واحترامي لما تكتب ولكن أحببت أن تقرأ والجميع معك تلك الكلمات :

يعلم أبناء الدعوة وأنصارها أن قرار الجماعة أولاً بالمشاركة في الانتخابات لم يؤخذ برؤية فردية، وإنما من خلال المبدأ الذي اتخذه الإخوان، وهو المشاركة في كل الانتخابات، سواءٌ كانت برلمانية أو محلية أو نقابية أو طلابية؛ وذلك وفق دراسة تقييمية للظروف والأحوال العامة والمناخ السياسي، ومدى استعداد الجماعة لذلك، ومدى جدوى الدخول من عدمه، وبعد استطلاع رأي الإخوان والوقوف على السلبيات والايجابيات، يكون الرأي الأخير لقيادة الجماعة، والذي يأتي موافقًا للقواعد السابقة من مراعاة المصلحة وضوابط الشرع والسياسة الشرعية وفقه الموازنات بين المصالح والمفاسد، وأن أيَّ قرار قد يتغيَّر بحسب الظروف والعرف والعادات والأحوال والأشخاص، وهكذا كان قرار الإخوان بالمشاركة في الانتخابات أولاً ثم قرار مقاطعة الانتخابات أخيرًا، وبناءً على ذلك فقد تختلف ردود الأفعال التي يُبديها البعض داخل الجماعة، موافقةً أو معترضةً على قرار ما، فهذه طبيعة بشرية، ولا يمكن أن تؤخذ على أنها تمرُّد داخل الجماعة أو وجود تيارات مختلفة، بل هو المناخ الصحِّي السائد وسط الإخوان؛ فالكل مطالب أن يقدِّم نصيحته في إطار الضوابط الشرعية والتنظيمية والأخلاقية، وليس على أحد من إثم ولا حرج ما دامت نصيحته تبنِي ولا تهدم وخالصة ومتجرِّدة لله وفي إطارها الشرعي والتنظيمي.

 
At 2:59 PM, Anonymous Anonymous said...

جميل اوى البوست دا

ودى من المدونات اللى بتبعها باستمرار بجد رائعه

انا هعلق على جزء الزواج فى حاجه انا مش فاهماها فى الاخوه يعنى مثلا كنت وسيطه بين اتنين والاخ راح بيت الاخت على اساس انه مش هيعرف يشوفها بره المهم راح بيت الاخت وقعدوا شويه مع بعض المهم فضل يهزر ويضحك وصوت ضحكته عالى وبعدين مشىوقعد 3 ايام ومردش بنتصل بيه يقول مفيش قبول

ماشى تمام اوى القبول دا بتاع ربنا بس ايه لزمه التهريج ومحسس كل الناس انك مرتاح والحورات دى ياريت نصيحه لكل اخ انك وانت قاعد مع عروسه تبقى محسسهم انك هتستخير وبعدين ربنا ييسر الحال متوهمهمشى ان كل حاجه تمام

انا مش عافه اذا كان كلامى دا ماشى مع البوست ولا لا بس صراحه كانو كلمتين واقفين فى زورى ومصدقت لقيت موضوع عشان اطلعهم

 

Post a Comment

Links to this post:

Create a Link

<< Home