قتلوني... موتونى... والله ما انا سايب ال 50 جنيه..!!

 

اقتلوني... موتونى... والله ما انا سايبها....!!

 

عبارة انطلقت من اعماق شاب.. بكل ما تحمله من مشاعر واحاسيس...!!

 

بدات القصة برجل في احد الاسواق.. يخرج 50 جنيه ليدفعها لاحد بائعى الفاكهة فيتنزعها شاب وينطلق باقصى سرعة.. ولان السوق مزدحم فما كاد الرجل ينطق حرامي.. حتى كان الشاب قد تم الامساك به.. واخذ الناس نزولاً فيه ضرباً.. فقال لهم .. موتونى ... اقتلوني.. والله مانا سايب ال 50 جنيه.. انا عندي ولدين وكل يوم بيناموا جعانين... حرام عليكم...!!

 

كيلو الفول 8 جنيه

ازازة الزيت 10 جنيه

كيلو اللحمة ب 40 جنيه بعد

كيلو الفراخ ب 20 جنيه والبانية ب 30

رغيف العيش بقى بنص جنيه

كيلو الرز بقى ب 4 جنيه

كيلو السكر بقى ب 4 جنيه ونص

كيلو المكرونة بحوالي 5 جنيه

كيلو الجبنة ب 22 جنيه

 

• 
  
  هذه الاسعار تقريبية.. 

 

كنت اشترى يوماً زجاجة زيت.. فالراجل قالي سعر لا اتذكره كان حوالي 10 جنيه.. انا وقفت مذهول امام الراجل... قلتله طب بالله عليك واحد من الي شغالين في جمع القمامة او العساكر.. بياخد 150-200 وعنده يجي 5 عيال.. بالله عليكم قولوا لي بالاسعار دي ازاى يعيش.. فالراجل قالي يعم سيبك هنقول واحد بياخد 1000 جنيه.. قلي دي هتكفي اكل ولا مواصلات ولا تعليم ولا هدوم ولا ولا لا...

 

مرة اخرى صليت الفجر في مسجد بعيد عني لتاخري في النزول.. وانا عائد كان هناك مخبز عيش.. الدنيا لسه ضلمة والمخبز لسه مفتحش.. ووالله الذي لا اله الا هو كان في ناس واقفة بتحجز مكانها في طابور العيش...!!

 

مرة ثالثة

في احد المناطق.. منطقة ليس بالغنية وليست بشديدة الفقر.. مررت على احد العطارين.. فجاءت سيدة... وطلبت ب "جنيه" زيت.. فالراجل اداها كمية اعتقد لو اتحطت في طاسة صغيرة هيكون في اماكن في الطاسة لسه ناشفة لم يتسن للزيت بسبب قلته ان يلامسها.. فما بالكم لو كانت عايزة تقلي حاجة.. والله انا نظرت للسيدة واولادها الثلاثة بكل الم وصمت..!

 

ضحايا طابور العيش.. وصلوا الى 50 قتيل....!!!!

 

حد مشى مرة من جنب طابور عيش وشاف الناس بتكون واقفة ازاى؟؟ الطابور بيكون ممتد من اول لاخر الشارع الي فيه الفرن...!!

 

 

النهاردة كنت راكب في تاكسي.. فبتكلم مع الراجل.. فبيقلي انا دلوقتي لازم اجيب في الفطار بيجي 5 جنيه فول عشان اكل العيلة... ثم يستطرد بكل الم.. قلي اجيب منين؟؟

 

كثير من الجمعيات الخيرية كان الي بياخد دخل 150 جنيه كانت الناس تعتبره غني ولا يستحق المساعدة.. لان الاغلب دخله في حدود ال 50 جنيه... ووالله الذي لا اله الا هو يا جماعة في ناس ممكن يكون كل الي بيجلها في الشهر 50 جنيه...قولوا بالله عليكم الناس دي تعيش ازاى..؟؟؟

 

عشرات الاسر الي كانت مستواها المادي ممتاز... تاثرت الى حد بشع بالغلاء..!!

 

بدانا نلحظ حالات انتحار كل شوية...!! خد مثال هنا وهنا

 

بصوا يا جماعة.. تعالوا نجرب نمشي يوم كامل مواصلات بالاتوبيس ابو نص جنيه.. ونسمع كلام بسطاء الناس ونعيش حياتهم وآلآمهم..تعالوا نركب المترو ونتلكم مع الناس..

تعالوا نقعد مع البواب ونسمعله .. تعالوا نقعد مع الشغالة... تعالوا نتكلم مع سواق التاكسي ونتلكم مع الناس في الميكروباص.. تعالوا نسمع منهم.. نسمع الامهم وشكاويهم.. والله والله هتسمع بلاوي..

 

تعالوا مش بس نسمعلهم بس.. لا نخلي الحرقة والالم ده يتحول لنتيجة... موجهة ضد شلة الطغاة اسال الله عزوجل الا يميتهم حتى يذوقوا ما ذاق افقر اهل مصر بسببهم..!!

 

تعالوا نقلهم وضعنا مش هيتغير غير لما مصر تتخلص من شلة الحرامية الي ماسكنها دول..

 

تعالوا نقلهم خلاص وخلاص مصر باننا نغير الطغاة الي ماسكنها دلوقتي... بانهم يقولوا كفاااااية باة...

 

تعالوا نوجههم لان هما في اوضاع ماساوية.. الخلاص هو باننا نرجع مصر لاهلها.. بثورة ضد نظام طاغية .. وشوية حرامية...!!

 

نستغل التجمعات في الجامعة في المترو في الاتوبيس في الميكروباص في النادي في اى حتة...

 

واخوانا الملتزمين كفاية باة سكوت... لحيتك الي انت مربيها باة جه وقت بتعمل باخلاقها.. كفاية باة.. كفاية نتحرك مع الناس.. مش معقولة ميشوفناش غير في المسجد.. اخوانا الي بيقولوا احنا ملناش دعوة بالسياسة مش وقته خالص.. دى حياة امة يا اخوانا.. يا جماعة مش بقلكم انتخابات... بقلكم لقمة عيش ناس مش لاقية تااااكل...!!

والناس الي عايز تشتغل معاهم دعوة.. هل انت متخيل واحد عنده بطالة ومش لاقي يتجوز ومش لاقي ياكل هل انت متخيل انك ممكن تدعوه.. ويكون هو فرد يساهم في اسلمة المجتمع؟

يا اخوانا بالله عليكم نفوق شوية.. ونطبق كلام من الي قاعدين نحفظه في الكتب ده...!

 

كنت في احد الشوارع مرة.. واقف انا واصدقائي.. فرجل شكله غلبان اوي.. بيعدي بيبيع شرايط دروس وكده...فجالي فقلتله شكراً ربنا يكرمك مش عايز.. فبعدين لقيته بيبصلي "انا ملتحي".. وبعيدن بيقول بكل حرقة والم ممزوج بالغضب... "ايوا باة اكتروا كده.. ولعوا في البلد دي احنا تعبنا خلااااص...". والله يا اخوانا انا لازلت حتى الان اتذكر الموقف بادق التفاصيل.. الراجل كان بيطلع الكلام من اعماااق اعماااق قلبه...لشخص لا يستحق.. ولكنه هو ظنه لشكله العام... يا جماعة والله انتوا الخلاص للشعب بعد الله عزوجل.. والشعب ورائكم يسير ولكم ينقاد.. لكن اتحركوا بالله عليكم ... كفاية باة .. كفاية اعتقالات وظلم وغلاء وتدهور وو...!!

 

 

كفاية خوف.. ننطلق وسط الناس ونطالب بان الناس تتحرك عشان تغير النظام الموجود ده.. اصل مفيش حل تاني يا اخوانا.. لو حد عنده حل تاني يقول...!!

 

نخش وسط الناس ونحس بالامهم "واغلبنا حاسس اصلاً بطبيعة الحال لان العملية مبقتش تفرق بين غني وفقير" .. ونطلع الطاقة الي جواهم في الطريق الصح.. اتجاه الخلاص من الكارثة الي بتحصل عندنا دي...

 

واحد من شلة الحرامية " احمد عز" طالع يقول على التليفزيون وبكل فخر انه دفع السنة الي فاتت 375 مليون جنيه ضرايب.. فهمي هويدي بيعقب على كده بيقول يعني مكسبه السنة الي فاتت بس مليار وسبعميت مليون جنيه... يعني قرابة 2 مليار في سنة واحدة.. هذا المعلن.. وهذا صديق ابن الطاغية... فما بالكم بابن الطاغية.. وما بالكم بالطاغية نفسه..!!

 

يا جماعة الشعب بيسحق.. والله بلا مبالغة... زمان كان عندنا تلات طبقات.. الان الطبقة الوسطى تتلاشى وتنزل للطبقة الفقيرة.. والطبقة الغنية بتزداد غنى... "كنت في عزاء صديق قريباً.. كنت حاسس ان المرسيدس بقت عربية 128.. من كتر عربيات المرسيدس الي كانت موجودة..."

 

يا اخوانا واجب علينا نتحرك.. وواجب على الملتزمين خصوصاً الان واصحاب الفكر الاسلامي ان ياخذوا دورهم ويكونوا في صدارة المتحركين لنجدة الشعب... هناك اداور كثيرة ساقتصر على جزء بسيط منها فقط

 

الاغنياء: اذا كنت تدفع قبل ذلك زكاة وصدقات بقيمة X اعتقد انه واجب عليك الان انك تطلع 10X ... يا اخوانا لازم يكون عندنا احساس.. يعني مش ادفع الي عليا وخلاص.. مهو انت لو متحركتش هتكون اول المتضررين.. قلي واحد مش لاقي ياكل ولا يشرب.. هل هيسيب الغني في حاله؟؟ من الطبيعي ان تتنتشر السرقات والجريمة والقتل...!!

 

الشباب:وقتكم تحركوا الناس.. كل ما تكون في تجمع كلموا الناس عن حالهم... طلعوا الخوف من قلوبهم.. وجهوهم وعرفوهم ان الخلاص باننا نخلص من اللصوص الطغاة الي حاكمين مصر دلوقتي.. متكسفش واستغل اى مكان عام تعرف تكلم فيه.. بتدي كورسات.. اتكلم وعرف الناس في وسط الكورس كانك بتكلم عادي في وسط البلد.. نتحرك وسط طبقات الاغنياء الي مش حاسة بالي بيحصل.. ناخدهم ونوريهم الشعب عايش ازاى ونحركهم.. ننشر الوعي بين الناس... نشارك في الاضرابات الي بتحصل ونشجع اضرابات العمال وننشر الميلات الي بتكلم عن الاضرابات دي... وادامنا الاضراب العام بتاع 6 ابريل ده... الشباب والنزول للشارع.. هذا سيحدث ان عاجلاً او آجلاً... فيجب الاستعداد له .. "بالنسبة لنقطة الشارع دي اتكلم عن الشباب فقط وليس الاخوات"...

 

الاخوات: اذا كان دور الشباب التحرك بين الناس وفي الشارع فانتوا دوركم تكون الاخوات الحنونات للشعب الي بيعاني.. الاعمال الخيرية ارفعوها اضعاف اضعاف... التبرعات اشتغلوا باقصى جهدكم.. ساعدوا في الكفالات الشهرية للاسر واعملوا على زيادتها.. زواج الشباب.. علاج المرضى... انطلقوا للعمل بكل قوتكم.. فهذه نقطتكم.. ونقطة الجمعيات الخيرية... ده وقت ان يكون العمل باضعاف اضعاف الماضي... ممكن تتجمع جمعيات وفرق خيرية تحت شعار " علشانك يا مصر" او "علشان اهلك يا مصر"... وتكون حملة خيرية على اقصى مستويات الجهد والتبرعات.

 

نتحرك يا شباب... تعالوا نتخيل.. شباب عاطل عن العمل لا يتسطيع الزواج ليس معه اموال للماكل والمشرب والملبس... متوقعين منه ايه... مشروع جريمة قتل او نصب او اغتصاب او او..!!

 

اخيراً يا اخوانا ده مش كلام ثائر او ثورجي.. ده الواقع .. والا قولوا لي اين الخلاص؟؟ يا اخوانا والله الشعب اوشك على الانفجار.. واذا انفجر بدون ان يوجه الى شئ ينفجر فيه.. فالكارثة هتحل علينا كلنا...!!

 

وانا اكتب هذا المقال تذكرت مقولة عمر بن الخطاب "والله لو عثرت بغلة في العراق..." رحمك الله يا عمر..!!

 

اخيراً: لكى تعلموا مدى يعني ازاى الناس طهقانة ومش مستحملة.. جروب على الفيس بوك يعلن عن اضراب يوم 6 ابريل.. يصل في قرابة اسبوع الي قرابة الاربعون الف مشترك..!!