الاقصى
#navbar-iframe { height: 0px; visibility: hidden; display: none; }

Tuesday, February 13, 2007

في الجامعة

في الجامعة...


 


عادة لا اذهب الى حرم جامعة القاهرة كثيراً.. فانا كليتي (هندسة)... لها مباني منفصلة خارج الحرم الجامعي.. وبالتالي لا ادخل إلى الحرم الجامعي كثيراً.. ولكن ادخل من حين لاخر... كان اخر هذه المرات منذ يومين... كان عندي إجتماع كده في كلية سياسة واقتصاد.. فكنت رايح.. وكان الساعة 1 يعني في ساعة اغلب الناس بتكون موجودة فيها...


الحرم الجامعي لمن لا يعرفه عبارة عن مباني كثيرة بالاضافة إلى حدائق كثيرة وديسكات....


 


صدقاً والله ربي... وانا في الطريق إلى الكلية.. كنت اسير وقلبي يعتصر...الماً وحزناً..  كنت من كل قلبى احمد ربي ان جعل لي عقلاً.. كنت من اعماق قلبي احمده ان جعلني مشغولاً في اغلب الاوقات... تذكرت كلمة قالها لي صديق عزيز... في موقف مثل هذا.. قال..." صدقاً نحمد الله عزوجل ان جعلناً نحمل هم امتنا... رغم ذنوبنا ومعاصينا الا ان هذه نعمة تستوجب احر الشكر..."...


 


كنا نرى هذه المظاهر كثيراً.. سواء في الشارع او لما كنا في المدرسة  او لو بتقعد في كافيه مع اصحابك او او... لكن في النهاية العدد يكون محدود.. يعني اقصى مكان تذهب اليه وترى مثل هؤلاء لن يزيد عن مائة مائتي فرد...


 


لكن ان ترى المئات من الطلبة.. يتعدون البضعة الاف... وهم فارغي الرؤوس بحق في مكان واحد فهذا شئ شنيع.. 


كنت اسير داخل الجامعة وارى الشباب والبنات منقسمون إلى شلل كده.. كل شلة 3-4 ولاد على زيهم من البنات... بعضهم قاعدين في حدائق الحرم الجامعي... والله تشعر فعلاً وانت تمر بجوارهم بنعمة اسمها العقل... كل واحد عايز يعمل اراجوز عشان يتمنظر ادام البنات ويستخف دمه الثقيل عشان يضحكهم... وكل بنت لازم تعمل ادام الولاد انها البنت الي مجابتش مصر زيها....


 


هذه الشلل الجماعية.. نيجي باة للديسكات الي موجودة في الجامعة.. امر واحاول بكل جهدى ان ابحث عن ديسك  يجلس عليه فردان من نفس الجنس فلا اجد.. كل ديسك قاعد عليه واحد زانق نفسه ولازق في حبيبته وقاعدين يهيسوا...


 كنت فعلاً مخنوق وقلت خلاص انا وصلت للكلية باة وباذن الله هخلص بسرعة وامشي.. طبعاً مش هتكلم على لبس بنات سياسة واقتصاد وتجارة انجلش.. مش مشكلة.. اللبس دي بالنسبالى مشكلة بسيطة جداً بالنسبة لانسان كل ما يفعله في حياته هو التفاهة... المهم بدانا الاجتماع.. وبعدين احنا قاعدين في حتة واسعة كده وانا بتكلم وناس قدامي بتسمع ففى نص الميتنج لقيت الناس بتضحك فببص ورايا لبعيد شوية.. لقيت بعيد عننا شوية في اخر الطرقة كده.. ولد وتلات بنات يعني شكلهم مش اقل من سنة تالتة او رابعة.... الاساتذة بيعملوا ايه.. لقيتهم جايبين تورته وبيبسي وشوية حاجات كده.. انا بصراحة كنت تعبان اوي من الصبح فنفضت لانى مكنتش مركز اوي.. بعدها بشوية ببص عليهم لقيتهم حاطين شمع على التورته وبيولعوه.. وتقريباً بيغنوا هابي بيرس داي تو يو... بصوا انا ساعتها فعلاً مقدرتش امسك نفسي من الضحك انا والناس الي في الميتنج.. وكلنا بنقول ايه الهبل ده... بس بعد ما مشيت والله صدقاً كان قلبي يبكي.. هما دول شباب المسلمين... هما دول احفاد خالد والقعقاع وصلاح الدين وقطز!!!!! هما دول حفيدات خديجة وعائشة وام سلمة والخنساء وسمية!!!!!


 


صعب اوي يكون تفكير شباب المسلمين بالتفاهة دي... صعب اوي اوي.. والناس تيجي تقول النصر بعيد... وليه مفيش نصر.. وليه الذل ده... ما اكيد لازم يكون في ذل واكيد لازم يكون في هزيمة...


تعالوا كده نبص على الكورة الارضية دلوقتي... غمض عينك وحط صباعك على اى حتة من الخريطة.. هتلاقي في مكان صباعك دم مسلمين... في كل مكان في العالم يراق دم المسلمين.. وتنتهك اعراضهم.. وتغتصب نسائهم.. ويقتل اطفالهم وشبابهم... انظروا إلى فلسطين والعراق والشيشان وافغانستان وتايلاند وكشمير والفلبين والصين والسودان والصومال و..... كمل انت باة....


والله حال المسلمين يبكي دم مش دموع... لكن الي يبكي اكتر... حالنا احنا.. حال شبابنا الي مش حاسس بحاجة...  شبابنا الي عايش في فراغ وتفاهة ولا يدرى بدماء اخوانه من بني امته التى تسفك في كل مكان..


والله لي اصدقاء صدقاً انظر اليهم واتحسر.. هذا الصديق الي كل هدفه وكل حياته انه يلبس الماركة الفلانية ويكون لبسه ماشي على الموضة ازاى... والتاني الي كل هدفه في حياته ان يصاحب ويمشي مع بنات.. والتالت الي كل الي بيعمله في حياته انه بيشرب حشيش ومخدرات .. والرابع الي يقعد يلعب استيمشن بالاتناشر والتلاتشر ساعة... والخامس الي كل الي بيعمله في حياته انه بيقعد مع اصحابه في الكافيه كل يوم وبس... والسادس الي قاعد طول اليوم على النت بيعمل شات.... والله من كل نموذج من دول اعرف الكثييير و منهم اصدقاء لي منذ زمن طويل.. وصدقاً والله كلما اتقابل مع بعض اصحابي من اصحاب هذه النماذج.. وكل واحد فيهم فاكر نفسه الشاب المعدي وان هي دي الحياة.. والله صدقاً بيصعبوا عليا.. والله فاهمين الحياة غلط.. وتحاول رغم كل شئء انك تجبهم معاك في اى درس دين ولا اى نشاط خيري.. ولا حتى اى حاجة تخرجهم من حالة الفراغ وعدم وجود هدف التى يعيشون فيها..


 


بغض النظر عن السبب الذي جعل شبابنا بهذه التفاهة الا ان مسئولية كبيرة وضخمة تقع على  الملتزمون..  مسئولية زرع الهدف وحمل هم الامة داخل هؤلاء الشباب... مسئولية ان نجعل هذا الشباب عنده سرطان ينتشر في جميع اعضاءه واجزاء جسمه وكل فكره.. اسمه العمل لهذه الامة.. ان يكون هذا الشباب كل فكره وهدفه في حياته ان تنهض هذه الامة.. ان يهب حياته بكل ما فيها من جهد ومال ونفس .. لشئ اسمه... الإسلام... وياله من شرف...


 


 


مباركات..


اجازة نصف العام هذه السنة كانت فعلاً في غاية الغرابة... ما يقرب من 6 من اصدقائي ارتبطوا.. سواء خطوبة او كتب كتاب او زواج.. وللاسف الشديد لم استطع ان اذهب إلى كثير منهم لانى صدقاً كنت في غاية الانشغال.. فاعتذر من هنا أشد الاعتذار لعدم تمكني من الحضور..


اعتذر للصديق العزيز ابراهيم عصام العريان.. والاخ العزيز محمد عبدالناصر.. واخي الكبير محمد رمضان... والصديق العزيز حاتم...


وايضاَ احب ان ابارك لاخ واخت شاء الله عزوجل ان يرتبطا في هذه الاجازة.. وانا اعرف الاثنين منذ زمن بعيد.. وتقريباًَ لم اكن اتخيل حدوث هذا لانهم بعيدون كل البعد ولا شئ يجمعهم ببعض.. ولكنه توفيق الله عزوجل الذي جمعهم ليشكلوا ثنائياً مميزاً.. اسال الله عزوجل ان يبارك لهم ويتتم عليهم بخير... مبروك يا احمد... ومبروك يا ايمان..


اسال الله عزوجل ان يبارك للجميع ويبارك عليهم ويجمع بينهم في خير.... وعقبال كل شباب وفتيات المسلمين باذن الله تعالى


 


 

Labels: ,

19 Comments:

At 2:16 PM, Blogger moslem_fm said...

حسبنا الله ونعم الوكيل

 
At 5:52 PM, Blogger AbdElRaHmaN AyYaSh said...

نعم عمي ..
والله كما تقول تماما
للأسف الشديد أصبحنا نعيش في أزمة هوية
لا تدري هل يدركون أنهم يفعلون خطأ
أم أنهم جهلاء
كتبت موضوعا قريبا من هذا في مدونتي
جزاكم الله خيرا

 
At 5:25 PM, Blogger shab masry said...

moslem_fm
بارك الله فيك على المرور والتعليق
AbdElRaHmaN AyYaSh
للاسف هم جهلة.. ويحتاجون بشدة إلى من ياخذ بيدهم ويريهم الطريق الصحيح.. كنت اتحدث في هذا الموضوع مع انثنين من اعز اصدقائى وهم من الطلاب الناشطين في الاخوان في كلية تجارة.. فواحد منهم بيقلي لما كان الاخوة بيعملوا قوافل دعوة.. ودي للي ميعرفهاش عبارة عن تحرك لعدد كبير من الطلاب الملتزمون في انحاء الجامعة يتكلمون مع الطلبة عن الالتزام والامة والاسلام ووو.. فكان بيقولي والله كانت هناك اناس تبكي لانها لم تكن تعرف طريق الالتزام من قبل.. فقط كل ما يحتاجون اليه هو التحرك منا

 
At 8:28 PM, Anonymous واحد مصرى خالص said...

دى أول صورة تظهر لشارون وهو مرمى على سرير المرض والموت ،انا شفتها فى موقع "إسلام تايم "أدخلوا شوفوها ،ربنا يفرحنا يا رب فى ناس تانية .
الرابط بتاع الموقع :
http://www.islamtime.net/

 
At 6:37 AM, Blogger elfagreya said...

قرأت موضوع يدور حول نفس النقطة فى مدونة الغريب..وحال هذا الشباب يذكرنا بجهلهم وفقدانهم لهويتهم ولكن قبل ذلك يذكرنا بتقصيرنا فى التواصل معهم بما يناسبهم..

هدانا الله واياهم

 
At 4:31 PM, Blogger BinO said...

السلام عليكم و رحمة الله و بركاته
كلامك موزون و جمييل
بس مش عارف ليه في حاجة مش مخلياني مستريح
عموماً ده اللي في قلبي و قلته
وربنا يهدينا جميعاً

 
At 6:43 AM, Blogger Egy Corner said...

وهنبارك لبراء امتى يا عم الحاج؟

:D

 
At 1:15 PM, Blogger fnan_geology said...

n88

ادخل عندى ضرورى جدااااااااااااا
وانصر الطلبه المفصولين


وسلاااااااام
https://www.fnangeology.blogspot.com/

 
At 6:53 PM, Blogger shab masry said...

elfagreya
عندك حق.. واحساسنا بتقصيرنا ناحية هؤلاء الناس هو اول الطريق للاصلاح

BinO
انا مش شايف ان الكلام فيه غموض او لف ودوران بصراحة ... ولا انت رايك ايه ::D:D:D

Egy Corner
في اي وقت ياريس:D:D:D??
انت عارفني جاهز على طول :D:D:D
طيب انا اسمي براء وعندي 19 سنة وعندي شقة كمان.. فهل من عروسة:D:D:D:D?
بهزر يا جماعة احسن الناس تفتكرني بتكلم جد والاقي حد يكلمنى بكرة يقولي انا جبتلك عروسة ولا حاجة:D

 
At 7:27 PM, Blogger jowayreya said...

salamu 3alaykom,
we7na hansa3edhom ezzay w nad3ohom we7na ben2ool 3alihom gahala!!!!
w ba3dean ana mesh shayfa aslan enohom gahala,ana shayfa ennohom fi 3'afla,

 
At 9:04 PM, Blogger عمرو طموح said...

اللهم اهد شباب المسلمين... و ردهم إلي دينك ردا جميلا...

تفتكروا يا جماعة لو الناس دي لقيت اللي يقوللهم علي الصح كانوا عملوا كده؟؟؟

محتاجين نحاسب نفسنا علي الحال ده... كل واحد هيتحاسب علي اللي عرفه... و قد ايه كان يقدر يغير بيه ناس كتير...

***

باشمهندس براء... سيادتك من هندسة... بس كاتب انك بتيجي كليتنا في ميتنجز... أفهم من كده إن معاليك مشارك في موديل... عموما لو جيت مرة يسعدني إننا نتقابل.

لو معاك حد في الموديل في تانية سياسة إنجلزي اسأله عني... قولله عمرو اللي معاكو:)

خلاص... مستنيك يا هندسة.

 
At 2:52 AM, Blogger shab masry said...

jowayreya

انا مش شايف فيها مشكلة اننا نقول عليهم جهلة بما يحدث حولنا... لو اخذنا معن كلمة جهل بمعناها اللغوي وليس بمعني شتيمة... عشان ابتدي اصلح.. اول الخطوات هي انى ادقق في المشكلة وانظر لها واتفحصها جيداً.. واعتقد ان وصف جهل بما يحدث حولهم هو حقيقة.. وهو لو كان عارف الي بيحصل حواليه كان هيفضل زي ما هو كده...
وده لا يمنع انه غافل ايضاً ... وانا ارى المعنينان قريبان من بعضهم إلى حد كبير..
الخلاصة انهم يحتاجون الى جهد رهيب منا للتوعية ولجعلهم يدركون خطورة موقف امتنا .. وواجبهم نحوها ووو

 
At 2:59 AM, Blogger shab masry said...

عمرو طموح

اعتقد انى شفتك مرة في السريع بس كانت بسرعة... المرة دي كانت يوم وقفة اساتذة الجامعة من اجل الاقصى... كنت يومها انا وابراهيم عصام العريان ومحمد عبدالناصر جايين مع بعض وصلينا في مسجد تجارة.. فتقريباً هما سلموا على حد اسمه عمرو من سياسة فاعتقد انه انت.. لان انت عارف الاخوة في سياسة كتير اوي ماشاء الله زي الرز يعني.. فمعتدقش ان في عمرو تاني اخ غيرك:D:D
انا ساعتها للاسف مكنتش مركز اوي عشان كانت في حاجة شغلاني ساعتها ومستنى تليفون وكده فمركزتش ولا عرفت اتعرف عليك.. لكن انا جه في دماغي الاسم فقط...

بالنسبة لعلاقتي بالموديلز... هو في الحقيقة انا مش مشارك في اى موديل.. لكن انا فقط لى علاقة تنظيمية وتعاون مع موديل هناك...فكان عندي ميتنج ساعتها هناك..لكن انا لست مشاركاً في اى موديل..

وربنا معاك على التغيير في سياسة ياريس:):):):)

 
At 12:06 PM, Anonymous aglo said...

ممتــــــــاز

 
At 12:48 AM, Blogger خطــاب said...

عودا حميدا مرة تانية

و اتمنى الا تنقطع تدويناتك المتميزة

:)

 
At 5:37 PM, Blogger rema20025 said...

بصراحة أنا عجبني كلامك جدا

جزاك الله خيرا

أنا فوقت لنفسي وأنا اللي كنت زعلانة ان كل صحباتي البنات بيكلموا ولاد في الجامعة وأنا لأ

بس فعلا دي حاجة تافهة

شكرا ليك علي النصيحة

ريم
سنة تالتة صيدلة القاهرة

 
At 5:38 PM, Blogger rema20025 said...

This comment has been removed by the author.

 
At 12:12 AM, Blogger Banota said...

فعلاً والله الواحد بقة بجد بيصعب علية جدأ الحال الى وصل الية عقول شباب مصر .. هما فى غيبوبة منسياهم نفسهم ولا دة مش باديهم وأحوال مصر البايظة والبطالة وأنتشار كل حاجة منيلة هى اللى خلتهم كدة .. بجد مفيش حاجة أقدر أعملها غير الدعاء ليهم
البوست بتاعك رائع لانة بيانقش قضية من أخطر القضايا التى من رغم من علمنا بها ولكننا نجهلها وراء ظهورنا
وفقك الله

 
At 9:49 AM, Blogger Krystal Barnett said...

There is nothing 100 % free nowadays, but insure that you Buy facebook reviews solitary from the genuine sources for profitable reputation on the web. buy 5 star facebook reviews

 

Post a Comment

Links to this post:

Create a Link

<< Home